యువకుడిపై దాడి చేసిన వారిని కఠినంగా శిక్షించాలి -కుటుంబానికి న్యాయం చేయాలి: జూపూడి శ్రీనివాసరావు

యువకుడిపై దాడి చేసిన వారిని కఠినంగా శిక్షించాలి

బాధిత కుటుంబానికి న్యాయం చేయాలి: జూపూడి శ్రీనివాసరావు

గుంటూరు, జనవరి 19, 2026:

యువకుడిపై విచక్షణారహితంగా దాడి చేసిన దుండగులను తక్షణమే అరెస్ట్ చేసి కఠినంగా శిక్షించాలని, బాధిత యువకుడికి మరియు అతని తల్లిదండ్రులకు న్యాయం చేయాలని ఆంధ్రప్రదేశ్ రాష్ట్ర రజక జనసేవా సంఘం ప్రధాన కార్యదర్శి జూపూడి శ్రీనివాసరావు డిమాండ్ చేశారు.

గుంటూరు నగరంలోని ఓ ప్రముఖ ఆసుపత్రిలో చికిత్స పొందుతున్న ప్రకాశం జిల్లా చెర్లోపల్లి మండలం గుంటుపల్లి గ్రామానికి చెందిన 21 ఏళ్ల చీమలదిన్నె మహర్షిని ఆయన పరామర్శించారు. ఈ సందర్భంగా మహర్షిని దాడికి గల కారణాలను స్వయంగా అడిగి తెలుసుకున్నారు.

ఈ సందర్భంగా జూపూడి శ్రీనివాసరావు మాట్లాడుతూ, స్వాతంత్ర్యం వచ్చి 70 సంవత్సరాలు దాటినా ఇప్పటికీ బడుగు, బలహీన వర్గాలపై అగ్రకులాల దాడులు కొనసాగుతుండటం దురదృష్టకరం అని తీవ్రంగా మండిపడ్డారు.

చిన్నపాటి ప్రమాదాన్ని కారణంగా చూపి, బట్లకోడూరు గ్రామానికి చెందిన అగ్రవర్ణాలకు చెందిన వ్యక్తులు రజక కులానికి చెందిన ఆటో డ్రైవర్ చీమలదిన్నె మహర్షిని చెట్టుకు కట్టేసి, రెండు గంటల పాటు విడతలవారీగా ముఖంపై, శరీరంపై తీవ్రంగా కొట్టారని ఆవేదన వ్యక్తం చేశారు.

ఈ ఘటనపై బాధితుడు పామూరు మండలం పోలీస్ స్టేషన్‌లో ఫిర్యాదు చేసినప్పటికీ సరైన న్యాయం జరగలేదని ఆయన ఆరోపించారు. పోలీసుల నిర్లక్ష్యం వల్ల బాధిత కుటుంబం తీవ్ర భయాందోళనకు గురవుతోందని తెలిపారు.

తక్షణమే మహర్షికి న్యాయం చేయడంతో పాటు, బాధిత కుటుంబానికి పూర్తి భద్రత కల్పించాలని ప్రభుత్వాన్ని డిమాండ్ చేశారు. న్యాయం జరిగే వరకు రాష్ట్రవ్యాప్తంగా రజక కుల సంఘాల నాయకులను ఏకతాటిపైకి తీసుకువచ్చి ఉద్యమాన్ని ఉద్ధృతం చేస్తామని హెచ్చరించారు.