వడ్డెరలకు రాజకీయ ప్రాతినిధ్యం కల్పించాలి జాతియ వడ్డెర సంఘం అధ్యక్షుడు పిట్ల శ్రీధర్

వడ్డెరలకు రాజకీయ ప్రాతినిధ్యం కల్పించాలి

హైదరాబాద్, జనవరి 11 (ఆంధ్రప్రభ):

వడ్డెర కులానికి రాజకీయంగా తగిన ప్రాతినిధ్యం కల్పించాలని తెలంగాణ డీసీసీ చైర్మన్, జాతీయ వడ్డెర సంఘం అధ్యక్షుడు పిట్ట శ్రీధర్ ఆధ్వర్యంలో డిమాండ్ చేశారు. స్వాతంత్ర్యం వచ్చినప్పటి నుంచి వడ్డెర కులం నుంచి కేవలం ఒక్కరే ఎమ్మెల్యేగా ఎన్నికయ్యారని ఆవేదన వ్యక్తం చేశారు. ఈ మేరకు ఆదివారం డీసీసీ కార్యాలయంలో వడ్డెర కుల సంఘాల సమావేశం నిర్వహించారు.

ఈ సందర్భంగా పిట్ట శ్రీధర్ మాట్లాడుతూ వడ్డెర కులం జనాభాలో అధికంగా ఉన్నప్పటికీ రాజకీయంగా తీవ్ర నిర్లక్ష్యం ఎదుర్కొంటోందన్నారు. శాసనసభ, శాసనమండలి, స్థానిక సంస్థల్లో వడ్డెరలకు తగిన ప్రాతినిధ్యం కల్పించాలని డిమాండ్ చేశారు. రాబోయే ఎన్నికల్లో వడ్డెర కులానికి కాంగ్రెస్ పార్టీ నుంచి టికెట్లు కేటాయించాలని కోరారు.

ఈ సమావేశంలో బీసీ జేఏసీ చైర్మన్ జాజుల శ్రీనివాస్ గౌడ్ మాట్లాడుతూ,

“వడ్డెరలు రాష్ట్ర అభివృద్ధిలో కీలక పాత్ర పోషిస్తున్న వర్గం. అయినప్పటికీ రాజకీయంగా వారికి న్యాయం జరగడం లేదు. బీసీల ఐక్యతతోనే హక్కులు సాధించుకోవాలి. వడ్డెరలకు తగిన రాజకీయ వాటా దక్కే వరకు బీసీ జేఏసీ తరఫున పోరాటం కొనసాగిస్తాం” అని స్పష్టం చేశారు.

అదేవిధంగా వడ్డెర బంధు పథకం ప్రవేశపెట్టి వడ్డెరలను ఆర్థికంగా ఆదుకోవాలని, మైనింగ్ క్వారీలు, కాంట్రాక్టుల్లో వడ్డెరలకు 20 శాతం రిజర్వేషన్ అమలు చేయాలని నాయకులు డిమాండ్ చేశారు.

ఈ కార్యక్రమంలో వడ్డెర సంఘం నాయకులు, మహిళా ప్రతినిధులు, వివిధ జిల్లాల నుంచి వచ్చిన కార్యకర్తలు పెద్ద సంఖ్యలో పాల్గొన్నారు.