ఇంకొల్లులో ఘనంగా రేనాటి బిడ్డ వడ్డె ఓబన్న 219వ జయంతి వేడుకలు

ఘనంగా రేనాటి బిడ్డ వడ్డె ఓబన్న 219వ జయంతి వేడుకలు

ఇంకొల్లులో నిర్వహించిన కార్యక్రమాల్లో పాల్గొన్న పర్చూరు నియోజకవర్గ బీసీ అధ్యక్షులు గుంజి అనిల్ కుమార్

ఇంకొల్లు:

స్వాతంత్ర్య సమరయోధుడు, రేనాటి బిడ్డ వడ్డె ఓబన్న 219వ జయంతి సందర్భంగా ఆదివారం ఇంకొల్లు గ్రామంలోని పర్చూరు రోడ్ అంకమ్మ కాలనీలో ఘనంగా జయంతి వేడుకలు నిర్వహించారు. ఈ కార్యక్రమాన్ని పర్చూరు నియోజకవర్గ బీసీ అధ్యక్షులు గుంజి అనిల్ కుమార్ ఆధ్వర్యంలో నిర్వహించారు.

ఈ సందర్భంగా గుంజి అనిల్ కుమార్ మాట్లాడుతూ, వడ్డె ఓబన్న స్వాతంత్ర్య పోరాటంలో ఉయ్యాలవాడ నరసింహారెడ్డికి ప్రధాన అనుచరుడిగా, సైన్యాధ్యక్షుడిగా కీలక పాత్ర పోషించారని గుర్తు చేశారు. బ్రిటిష్ పాలకులకు వడ్డె ఓబన్న ముప్పుతిప్పలు పెట్టినట్లు చరిత్రలో స్పష్టమైన ఆనవాళ్లు ఉన్నాయని పేర్కొన్నారు. దేశ స్వాతంత్ర్యం కోసం ప్రాణత్యాగం చేసిన ఆయన నేటి తరానికి ఆదర్శమని కొనియాడారు.

అనంతరం ఇంకొల్లు గ్రామంలోని రామకృష్ణ థియేటర్ వెనుక ఉన్న వడ్డెర కాలనీలో నివాసం ఉంటున్న గుంజి రాంబాబు తీవ్ర ఆరోగ్య సమస్యలతో బాధపడుతూ ఒక కాలు తొలగించుకున్న విషయం తెలుసుకున్న గుంజి అనిల్ కుమార్, సబ్‌ ఇన్స్పెక్టర్ ఆఫ్ పోలీస్ జి. సురేష్, గుంజి వెంకటేశ్వర్లు కలిసి ఆయనను పరామర్శించారు. కుటుంబ పరిస్థితిని అడిగి తెలుసుకొని, వారి కుటుంబానికి నిత్యవసర సరుకులు అందజేశారు.

ఈ సందర్భంగా గుంజి అనిల్ కుమార్ మాట్లాడుతూ, గుంజి రాంబాబుకు ప్రభుత్వ పింఛను మంజూరు అయ్యేలా సంబంధిత అధికారులతో మాట్లాడుతున్నామని, భవిష్యత్తులో ఎలాంటి సమస్య వచ్చినా ఎల్లవేళలా అందుబాటులో ఉంటామని భరోసా ఇచ్చారు.

ఈ కార్యక్రమంలో కాలనీ వాసులు, యువకులు తదితరులు పెద్ద సంఖ్యలో పాల్గొన్నారు.