విజయనగరం జిల్లాలో సావిత్రిబాయి పూలే జయంతి – బీసీ సంఘాల ఘన నివాళులు

విజయనగరం జిల్లాలో సావిత్రిబాయి పూలే జయంతి – బీసీ సంఘాల ఘన నివాళులు

విజయనగరం జిల్లా బీసీ సంఘాల ఆధ్వర్యంలో, కలెక్టర్ కార్యాలయం సమీపంలోని పూలే సర్కిల్ వద్ద సావిత్రిబాయి పూలే జయంతిని ఘనంగా నిర్వహించారు. ఈ కార్యక్రమానికి బీసీ సంఘాల నాయకులు, కార్యకర్తలు, మహిళలు పెద్ద సంఖ్యలో హాజరై నివాళులు అర్పించారు.

కార్యక్రమంలో భాగంగా సావిత్రిబాయి పూలే చిత్రపటానికి పూలమాలలు వేసి, ఆమె చేసిన సేవలను స్మరించుకున్నారు. మహిళా విద్య, సామాజిక సమానత్వం కోసం ఆమె చేసిన పోరాటం భారత సమాజ చరిత్రలో చిరస్థాయిగా నిలిచిందని వక్తలు పేర్కొన్నారు.

ఈ సందర్భంగా ముఖ్య అతిథిగా పాల్గొన్న శ్రీమతి ఎలిగాపు విజయలక్ష్మి మాట్లాడుతూ, స్త్రీలకు చదువు అనే దీపాన్ని వెలిగించిన విప్లవమూర్తి సావిత్రిబాయి పూలే అని కొనియాడారు. విద్య ద్వారా మహిళలు, వెనుకబడిన వర్గాలు అభివృద్ధి సాధించగలవని ఆమె చూపిన మార్గం నేటికీ ఆదర్శప్రాయమని తెలిపారు.

అఖిల భారత ఓబీసీ సంఘం రాష్ట్ర ప్రధాన కార్యదర్శిగా, బీసీ వెనుకబడిన కులాల కన్వీనర్‌గా, ఉమ్మడి విజయనగరం జిల్లాలో ఆమె చేస్తున్న సేవలు ప్రశంసనీయమని పాల్గొన్న నాయకులు పేర్కొన్నారు. బీసీ వర్గాల హక్కులు, విద్యా అభివృద్ధి కోసం ఐక్యంగా పోరాడాల్సిన అవసరం ఉందని ఈ సందర్భంగా పిలుపునిచ్చారు.

ఈ కార్యక్రమం ద్వారా సావిత్రిబాయి పూలే ఆశయాలను ప్రతి ఒక్కరూ ఆచరణలో పెట్టాలని, ముఖ్యంగా మహిళా విద్యకు ప్రాధాన్యం ఇవ్వాలని బీసీ సంఘాల నాయకులు కోరారు.