“బీసీ బంధు” కేసన శంకరరావుకు స్వగ్రామంలో ఘన సత్కారం

“బీసీ బంధు” కేసన శంకరరావుకు స్వగ్రామంలో ఘన సత్కారం

రేపల్లె నియోజకవర్గం | నిజాంపట్నం మండలం | బొర్రావారిపాలెం

ఆంధ్రప్రదేశ్ బీసీ సంక్షేమ సంఘం రాష్ట్ర అధ్యక్షులు, అహీర్ అవార్డు గ్రహీత “బీసీ బంధు” కేసన శంకరరావుకు వారి స్వగ్రామమైన బొర్రావారిపాలెంలో ఘన సన్మానం జరిగింది. 2026 నూతన సంవత్సరాన్ని పురస్కరించుకొని గ్రామ ప్రజలు, బీసీ నాయకులు, కార్యకర్తలు పెద్ద ఎత్తున తరలివచ్చి పేదలు–బడుగుల ఆరాధ్య నాయకుడికి హృదయపూర్వక శుభాకాంక్షలు తెలియజేశారు.

గజమాలలు, బొకేలు, శాలువాలతో కేసన శంకరరావును ఆత్మీయతానురాగాలతో సత్కరించారు. ఈ సందర్భంగా పలువురు బీసీ నాయకులు మాట్లాడుతూ—అణగారిన వర్గాల హక్కుల కోసం గల్లీ నుంచి ఢిల్లీ వరకు కేసన శంకరరావు నేతృత్వంలో నిర్వహించిన ఉద్యమాలు, పోరాటాలు చరిత్రలో చిరస్థాయిగా నిలిచిపోతాయని కొనియాడారు.

సన్మానానికి ప్రతిస్పందనగా కేసన శంకరరావు మాట్లాడుతూ—దశాబ్దాలుగా సాగిన బీసీ ఉద్యమాల ఫలితంగానే నేడు కేంద్ర ప్రభుత్వం జనగణనతో పాటు కులగణనకు సిద్ధమవుతోందని అన్నారు. రాష్ట్రంలోని కూటమి ప్రభుత్వం బీసీలకు ఇచ్చిన ఎన్నికల హామీలు కూడా బీసీ సంక్షేమ సంఘం నిరంతర పోరాటాల ఫలితమేనని పేర్కొన్నారు. వాగ్దానాలు చేయడం సరిపోదని, వాటిని చిత్తశుద్ధితో కేంద్ర–రాష్ట్ర ప్రభుత్వాలు అమలు చేయాలని డిమాండ్ చేశారు.

డెడికేటెడ్ కమిషన్ ఏర్పాటు చేసి సమగ్ర కులగణన నిర్వహించాలని, బీసీలకు జనాభా దామాషా ప్రకారం శాసనసభలు, స్థానిక సంస్థల్లో రిజర్వేషన్లను చట్టబద్ధంగా అమలు చేయాలని కోరారు. రాష్ట్ర ముఖ్యమంత్రి చంద్రబాబు నాయుడు కేంద్రంపై ఒత్తిడి పెంచి పార్లమెంటు ద్వారా రాజ్యాంగ సవరణ చేయించి, షెడ్యూల్–9లో చేర్చడం ద్వారా పెంచిన బీసీ రిజర్వేషన్లకు రాజ్యాంగ–చట్టపర రక్షణ కల్పించాలని విజ్ఞప్తి చేశారు. అలా చేస్తే బీసీలకు సామాజిక న్యాయం జరిగి, చంద్రబాబు నాయుడు మరియు నరేంద్ర మోడీ చరిత్ర పుటలలో చిరస్థాయిగా నిలిచిపోతారని ఆకాంక్షించారు.

అలాగే బీసీల రక్షణ చట్టం, ప్రమోషన్లలో రిజర్వేషన్లు, బ్యాక్లాగ్ పోస్టుల భర్తీ, 50 ఏళ్లకే సామాజిక పెన్షన్లు అమలు చేయాలని డిమాండ్ చేశారు. కేంద్రంలో ప్రత్యేక ఓబీసీ మంత్రిత్వ శాఖ, ప్రత్యేక బడ్జెట్ ఏర్పాటు చేయాలని, చట్టసభలలో ఓబీసీ మహిళలకు సబ్–కోటా కల్పిస్తూ మహిళా రిజర్వేషన్ చట్టానికి సవరణ చేయాలని సూచించారు. అన్ని రంగాలలో ఓబీసీల ఆర్థికాభివృద్ధికి తోడ్పాటు అందించాలని కోరారు. బీసీల సాధికారితతోనే వికసిత్ ఆంధ్రప్రదేశ్–వికసిత్ భారత్ సాధ్యమని కేసన శంకరరావు స్పష్టం చేశారు.

ఈ కార్యక్రమంలో రాష్ట్ర నాయకులు మేకా వెంకటేశ్వరరావు, గ్రామ సర్పంచ్ కేసన నాగముత్యాలమ్మ, ఎంపిటిసి బొర్రా బుడారంకమ్మ, రామకృష్ణ, కాగితాల సుబ్బారావు, జుజ్జువరపు సురేష్, చింతల ప్రసాద్, అనగాని హరికృష్ణ, శ్రీనివాసమూర్తి, రాఘవయ్య, ఏడుకొండలు చినబాబు, సాయిబాబు, కూరపాటి రాజు తదితరులు పాల్గొని ప్రసంగించారు.