బెస్త కార్పొరేషన్‌కు తక్షణమే నిధులు మంజూరు చేయాలి

బెస్త కార్పొరేషన్‌కు తక్షణమే నిధులు మంజూరు చేయాలి

బీసీ సంక్షేమ శాఖ మంత్రి సబితమ్మకు అఖిల భారత బెస్త మహాసభ విన్నపం

ఆంధ్రప్రదేశ్ రాష్ట్రంలో కూటమి ప్రభుత్వం అధికారంలోకి వచ్చి దాదాపు 18 నెలలు పూర్తయిన నేపథ్యంలో, రాష్ట్రంలోని బెస్తలను గుర్తించి ఆంధ్రప్రదేశ్ బెస్త కార్పొరేషన్ ఏర్పాటు చేసినందుకు కూటమి ప్రభుత్వానికి అఖిల భారత బెస్త మహాసభ హృదయపూర్వక కృతజ్ఞతలు తెలిపింది.

ఈ సందర్భంగా సోమవారం నాడు అఖిల భారత బెస్త మహాసభ రాష్ట్ర అధ్యక్షులు పి.జి. వెంకటేష్ గారు, రాష్ట్రంలోని బెస్తల సమస్యలు పరిష్కరించాలని కోరుతూ బీసీ సంక్షేమ శాఖ మంత్రి గౌరవనీయులు సబితమ్మ గారికి వినతిపత్రం సమర్పించారు.

ఈ సందర్భంగా వెంకటేష్ గారు మాట్లాడుతూ—
రాష్ట్రంలో 18 లక్షలకు పైగా జనాభా కలిగిన బెస్త సమాజం ఆర్థికంగా, విద్యాపరంగా వెనుకబడి ఉన్నదని, అందుకే బెస్త కార్పొరేషన్‌కు కనీసం రూ.5,000 కోట్ల నిధులు కేటాయించాలని డిమాండ్ చేశారు.

కమ్మ, రెడ్డి, ఆర్యవైశ్య కుల కార్పొరేషన్‌ల మాదిరిగా బెస్త కోఆపరేటివ్ క్రెడిట్ సొసైటీ ఏర్పాటు చేసి, బెస్త యువతకు తక్కువ వడ్డీతో రుణాలు అందించాలని కోరారు.

అలాగే ఎంఎస్ఎంఈ పార్కుల్లో ఈడబ్ల్యూఎస్ వర్గాలకు ఇస్తున్న ప్రాధాన్యతనే బెస్తలకు కూడా కల్పించి, చదువుకున్న ప్రతి బెస్త యువకుడిని పారిశ్రామికవేత్తగా తీర్చిదిద్దే విధంగా ప్రభుత్వం చర్యలు తీసుకోవాలని విజ్ఞప్తి చేశారు.

విదేశాల్లో చదవాలనుకునే బెస్త విద్యార్థుల కోసం విదేశీ విద్యా పథకం ప్రారంభించి, వారి విద్యాభివృద్ధికి ప్రభుత్వం అండగా నిలవాలని కోరారు.

బెస్త కార్పొరేషన్ చైర్మన్, డైరెక్టర్లతో పాటు అన్ని బెస్త కుల సంఘాల ప్రతినిధులతో సమావేశం నిర్వహించి, వారి సమస్యలను సమగ్రంగా పరిష్కరించాలని సూచించారు.
ఇతర ఈడబ్ల్యూఎస్ వర్గాలకు వారి కార్పొరేషన్‌ల ద్వారా అమలవుతున్న అభివృద్ధి, సంక్షేమ పథకాలన్నీ బెస్త కార్పొరేషన్ ద్వారా కూడా అందించాలని డిమాండ్ చేశారు.

అంతేకాకుండా, బెస్తలకు ఇప్పటివరకు కేవలం చైర్మన్, డైరెక్టర్ పదవులకే పరిమితం చేసి, ఇతర రాష్ట్ర, జిల్లా స్థాయి నామినేటెడ్ పదవులు, అలాగే త్వరలో ఖాళీ కాబోతున్న ఎమ్మెల్సీ (గవర్నర్ కోటా) వంటి రాజకీయ అవకాశాలు కేటాయించలేదని ఆవేదన వ్యక్తం చేశారు. ఈ అంశంలో కూటమి ప్రభుత్వం బెస్తలకు న్యాయం చేయాలని కోరారు.

దీనికి స్పందించిన మంత్రి సబితమ్మ గారు, త్వరలో ఆదరణ–3 పథకం అమలు చేస్తామని హామీ ఇచ్చారు.
అయితే ఆదరణ పథకం అమలుపై సంతోషం వ్యక్తం చేసిన వెంకటేష్ గారు, బెస్తలను కేవలం కులవృత్తులకే పరిమితం చేయకుండా, అగ్రకుల కార్పొరేషన్‌లకు అమలవుతున్న అభివృద్ధి పథకాల మాదిరిగానే బెస్త కార్పొరేషన్‌కు తగిన నిధులు మంజూరు చేసి సమాజాన్ని అభివృద్ధి దిశగా నడిపించాలి అని మరోసారి స్పష్టం చేశారు.