ఏప్రిల్ రెండవ వారం లో అనంతపురంలో బహుజన ఐక్య ప్రజా ఫ్రంట్ సమావేశం

ఏప్రిల్ రెండవ వారం లో అనంతపురంలో బహుజన ఐక్య ప్రజా ఫ్రంట్ సమావేశం

2029 అధికార లక్ష్యంగా బహుజన కూటమి సన్నాహాలు: డా. పోతుల నాగరాజు

అనంతపురం:
రాష్ట్రంలో బహుజనుల హక్కులు, అధికారాలు, అభివృద్ధి, సంక్షేమం కోసం పనిచేస్తున్న రాజకీయ పార్టీలు, ప్రజా సంఘాలను ఏకం చేసే దిశగా బహుజన ఐక్య ప్రజా ఫ్రంట్ సమావేశం ఏప్రిల్ రెండవ వారంలో అనంతపురం జిల్లా కేంద్రంలో నిర్వహించనున్నట్లు రిజర్వేషన్ల పరిరక్షణ సమితి వ్యవస్థాపకులు డా. పోతుల నాగరాజు వెల్లడించారు.

ఈ సమావేశం ద్వారా 2029 ఎన్నికలను లక్ష్యంగా చేసుకుని బహుజన కూటమి ఏర్పాటుకు సన్నాహాలు ప్రారంభమయ్యాయని ఆయన తెలిపారు. రాష్ట్రంలో దోపిడి రాజకీయాలకు, పాలక వర్గాల ఆధిపత్యానికి వ్యతిరేకంగా ప్రతి బహుజనుడు ఐక్యంగా ముందుకు రావాల్సిన అవసరం ఉందని అన్నారు.

గత 77 సంవత్సరాలుగా రాష్ట్ర పాలన రెండు కుటుంబాలు, రెండు పార్టీలు, రెండు కులాల ఆధిపత్యంలోనే కొనసాగుతోందని, దీని ప్రభావం వల్ల దళితులు, గిరిజనులు, బీసీలు, మైనారిటీలు, బలహీన వర్గాలు, పేదలు తీవ్రంగా నష్టపోయారని డా. పోతుల నాగరాజు పేర్కొన్నారు.
రాష్ట్ర జనాభాలో 87 శాతం ఉన్న బహుజనుల ఓట్లతో అధికారంలోకి వచ్చిన పాలకులు, వారి హక్కులు, అధికారాలు, అభివృద్ధి, సంక్షేమాన్ని విస్మరించారని విమర్శించారు.

భారత రాజ్యాంగం అందించిన ఫలాలు ఎవరికీ దక్కుతున్నాయో ప్రతి ఒక్కరూ ఆలోచించాల్సిన సమయం వచ్చిందని ఆయన అన్నారు. ఈ నేపథ్యంలో బహుజన సోదరులు–సోదరీమణులు, విద్యావంతులు, ఉద్యోగులు, రచయితలు, కళాకారులు, కుల సంఘాలు, ప్రజా సంఘాలు, విద్యార్థి, రైతు, కార్మిక, మహిళా సంఘాలు ఐక్యంగా ముందుకు రావాలని పిలుపునిచ్చారు.

కాన్షిరాం గారి “మన ఓట్లు మనమే వేసుకొని, మనమే మన రాజ్యాన్ని పరిపాలించుకోవాలి” అనే భావనను ముందుకు తీసుకువెళ్తూ, డా. బీఆర్ అంబేద్కర్ గారి రాజ్యాంగ ఆశయాల సాధన కోసమే ఈ ఐక్యత అవసరమని డా. పోతుల నాగరాజు స్పష్టం చేశారు.

ఈ సమావేశంలో BC, SC, ST, మైనారిటీ కుల సంఘాల నేతలు, ప్రజా సంఘాలు, ఉద్యోగ సంఘాల నాయకులు, మహిళా ప్రతినిధులు, విద్యార్థి నేతలు పాల్గొననున్నారని తెలిపారు. అలాగే BSP, SP, RJD, DMK, BCY పార్టీ, తెలంగాణ రాజ్యాధికార పార్టీ వంటి బహుజనుల అభివృద్ధి, సంక్షేమం కోసం పనిచేస్తున్న రాజకీయ పార్టీల నేతలతో చర్చించి,
2029 ఎన్నికల్లో అధికారాన్ని బహుజనుల చేతుల్లోకి తీసుకురావాలనే లక్ష్యంతో “బహుజన ఐక్య ప్రజా ఫ్రంట్”గా ముందుకు వెళ్లే కార్యాచరణను ఖరారు చేయనున్నట్లు ఆయన తెలిపారు.