తల్లిదండ్రుల పోరాటానికి మరో విజయం

తల్లిదండ్రుల పోరాటానికి మరో విజయం

తరగతుల విభజన వివక్షపై వెనక్కి తగ్గిన మోహన్ బాబు యూనివర్సిటీ యాజమాన్యం

అమరావతి:

మోహన్ బాబు యూనివర్సిటీలో విద్యార్థులపై అమలుచేసిన వివక్షాపూరిత తరగతుల విభజన నిర్ణయానికి తల్లిదండ్రుల పోరాటం ఫలితాన్ని ఇచ్చింది. ది పేరెంట్స్ అసోసియేషన్ ఆఫ్ ఆంధ్రప్రదేశ్ (PAAP) ఆధ్వర్యంలో విద్యార్థి తల్లిదండ్రులు చేపట్టిన ఉద్యమంతో ప్రభుత్వం జోక్యం చేసుకోవడంతో, యూనివర్సిటీ యాజమాన్యం ఎట్టకేలకు తన నిర్ణయాన్ని వెనక్కి తీసుకుంది.

“స్కిల్ డెవలప్‌మెంట్” పేరుతో అదనపు ఫీజు చెల్లించిన విద్యార్థులకు ఒక విధంగా, చెల్లించని విద్యార్థులకు మరో విధంగా తరగతులు విభజించడం ద్వారా యాజమాన్యం తీవ్ర వివక్షకు పాల్పడిందని PAAP ఆరోపించింది. ఈ అంశంపై ప్రభుత్వం, ఉన్నత విద్యాశాఖకు చేసిన ఫిర్యాదులతో అధికారులు స్పందించి యూనివర్సిటీపై ఒత్తిడి తెచ్చినట్లు తెలిపారు.

దీంతో యాజమాన్యం ఇకపై అందరు విద్యార్థులను ఒకే తరగతిగా నిర్వహిస్తామని ప్రకటించింది. ఈ నిర్ణయాన్ని తల్లిదండ్రుల ఐక్యతకు లభించిన కీలక విజయంగా PAAP పేర్కొంది.

ఇదే సమయంలో, స్కిల్ డెవలప్‌మెంట్ పేరుతో ఒక్కో విద్యార్థి నుంచి రూ. 40,000 చొప్పున అక్రమంగా వసూలు చేసిన అంశంపై ప్రభుత్వం ఇంకా తుది నిర్ణయం తీసుకోవాల్సి ఉందని PAAP తెలిపింది. ఫీజు చెల్లించని విద్యార్థులను ఇండస్ట్రియల్ ట్రైనింగ్ నుంచి తొలగిస్తామని బెదిరించడం చట్టవిరుద్ధమని స్పష్టం చేసింది.

అలాగే, గతంలో ఇదే యూనివర్సిటీ విద్యార్థుల నుంచి అక్రమంగా వసూలు చేసిన రూ. 26 కోట్లను తిరిగి చెల్లించాలని, రూ. 15 లక్షల పెనాల్టీ చెల్లించాలని రాష్ట్ర ఉన్నత విద్యా నియంత్రణ మరియు పర్యవేక్షణ కమిషన్ (APHERMC) ఇచ్చిన ఉత్తర్వులను ప్రభుత్వం తక్షణమే అమలు చేయాలని PAAP డిమాండ్ చేసింది.

విద్యను వ్యాపారంగా మార్చి నిబంధనలకు విరుద్ధంగా వ్యవహరించే యూనివర్సిటీలను సహించేది లేదని PAAP హెచ్చరించింది. అక్రమ ఫీజుల వసూళ్లపై వెంటనే విచారణ జరిపి విద్యార్థులకు న్యాయం చేయాలని కోరింది. తల్లిదండ్రులంతా ఐక్యంగా ఉంటేనే విద్యా చట్టాల అమలు సాధ్యమవుతుందని, మన పిల్లల భవిష్యత్తు రక్షణ సాధ్యమవుతుందని PAAP పేర్కొంది.

సంప్రదింపు వివరాలు:

ది పేరెంట్స్ అసోసియేషన్ ఆఫ్ ఆంధ్రప్రదేశ్ (PAAP)

📞 ఫోన్: +91 63053 13558

📧 ఈమెయిల్: parentsassociationap@gmail.com