15వ ఆర్థిక సంఘం నిధుల విడుదలకు గ్రీన్ సిగ్నల్ – రాష్ట్రానికి రూ.1,000 కోట్లు త్వరలో విడుదల!

కేంద్ర ప్రభుత్వం 15వ ఆర్థిక సంఘం నిధుల విడుదలకు గ్రీన్ సిగ్నల్ ఇచ్చింది. గ్రామ పంచాయతీలకు రావాల్సిన రూ.2,500 కోట్ల పెండింగ్ నిధుల్లో ఈ నెలాఖరులోపు కనీసం రూ.1,000 కోట్లు విడుదల చేయనున్నట్లు రాష్ట్ర ప్రభుత్వానికి కేంద్రం నుంచి సమాచారం అందింది. మిగిలిన మొత్తాన్ని వచ్చే నెలలో విడుదల చేసేందుకు కూడా కేంద్రం అంగీకరించినట్లు తెలుస్తోంది.

ఈ నేపథ్యంలో పంచాయతీరాజ్, గ్రామీణాభివృద్ధి శాఖ (పీ.ఆర్ & ఆర్.డి) నిధుల వినియోగంపై కీలక మార్గదర్శకాలను జారీ చేసింది. అన్ని జిల్లాలకు మెమో పంపి, నిధుల వినియోగంలో డిజిటల్ విధానం తప్పనిసరి అని స్పష్టం చేసింది.

ప్రతి గ్రామ పంచాయతీకి ప్రత్యేక బ్యాంకు ఖాతా

15వ ఆర్థిక సంఘం నిధుల వినియోగం కోసం ప్రతి గ్రామ పంచాయతీ ప్రత్యేక బ్యాంకు ఖాతాను నిర్వహించాల్సి ఉంటుందని రాష్ట్ర ప్రభుత్వం తెలిపింది. ఆ ఖాతాను పీఎఫ్ఎంఎస్ (Public Financial Management System) పోర్టల్‌లో నమోదు చేసి యూనిక్ ఏజెన్సీ కోడ్ పొందాలి. అలాగే ఈ-గ్రామ్స్వరాజ్ పోర్టల్‌లో కూడా బ్యాంకు ఖాతా వివరాలను నమోదు చేయడం తప్పనిసరి.

డిజిటల్ విధానంలో పారదర్శకత కోసం ఉపసర్పంచ్‌ను “మేకర్‌గా”, సర్పంచ్‌ను “చెకర్‌గా” నియమించారు. వీరి డిజిటల్ సంతకాలను ఈ-గ్రామ స్వరాజ్ నమోదు చేసి సంబంధిత ఎంపీడీఓల ద్వారా ఆమోదం పొందాలి. ఇందుకు క్లాస్-3 డిజిటల్ సిగ్నేచర్ సర్టిఫికెట్లు తప్పనిసరి. సైనింగ్, ఎన్‌క్రిప్షన్ సౌకర్యాలతో పాటు యూఎస్బీ టోకెన్ ఉండాలని మార్గదర్శకాల్లో పేర్కొన్నారు.

డిజిటల్ ప్రక్రియ పూర్తయిన తర్వాతే నిధుల వినియోగం

ఈ మొత్తం డిజిటల్ ప్రక్రియ పూర్తయిన తరువాతే 15వ ఆర్థిక సంఘం నిధులను వినియోగించుకోవచ్చని పంచాయతీరాజ్ శాఖ స్పష్టం చేసింది. రాష్ట్రంలోని అన్ని జిల్లా పంచాయతీ అధికారులు అవసరమైన డిజిటల్ సిగ్నేచర్ సర్టిఫికెట్లను జీఈఎం పోర్టల్, ఈ-ప్రోక్యూర్‌మెంట్ లేదా ఇతర టెండర్ విధానాల ద్వారా సేకరించాలని పంచాయతీరాజ్ కమిషనర్ శ్రుతి ఓజా ఆదేశించారు.

నిధుల విడుదలతో గ్రామీణాభివృద్ధి పనులకు ఊతం లభించనుందని అధికారులు భావిస్తున్నారు. గ్రామాల్లో మౌలిక సదుపాయాల అభివృద్ధికి ఈ నిధులు కీలకంగా మారనున్నాయి.