ఏపీలో బీసీలపై దాడి చేస్తే జైలు తప్పదు

ఏపీలో బీసీలపై దాడి చేస్తే జైలు తప్పదు

ముందస్తు బెయిల్ లేదు.. 6 నెలల నుంచి 5 ఏళ్ల వరకు శిక్ష

‘ఏపీ బీసీ రక్షణ చట్టం’ ముసాయిదా సిద్ధం4

Andhra Pradeshలో బీసీలపై జరుగుతున్న దాడులు, వేధింపులు, సామాజిక బహిష్కరణలను అరికట్టేందుకు రాష్ట్ర ప్రభుత్వం ‘ఏపీ బీసీ రక్షణ చట్టం (AP BC Protection Act)’ ముసాయిదాను రూపొందించింది. ఎన్నికల్లో ఇచ్చిన హామీ మేరకు ఈ చట్టాన్ని తీసుకువచ్చే దిశగా ప్రభుత్వం ముందుకు సాగుతోంది.

ఈ ముసాయిదా చట్టం ప్రకారం, బీసీలపై సామాజిక బహిష్కరణ, కులం పేరుతో అవమానాలు, దాడులు, వేధింపులు వంటి అఘాయిత్యాలకు పాల్పడితే కఠిన శిక్షలు విధించనున్నారు. మొదటిసారి నేరానికి పాల్పడితే 6 నెలల నుంచి 5 ఏళ్ల వరకు జైలు శిక్షతో పాటు జరిమానా విధించే అవకాశం ఉంది. అదే నేరం పునరావృతమైతే, కనీసం ఒక సంవత్సరం నుంచి రెండు సంవత్సరాల వరకు జైలు శిక్ష పడే అవకాశం ఉంది. కోర్టు అవసరమైతే శిక్షను మరింత పెంచవచ్చు.

బీసీలపై వేధింపులకు సంబంధించిన కేసుల్లో ముందస్తు బెయిల్‌కు అవకాశం ఉండదు. ప్రస్తుతం ఈ ముసాయిదా న్యాయశాఖ సమీక్షలో ఉంది. ఆ తర్వాత మంత్రివర్గ ఆమోదం పొందిన అనంతరం శాసనసభలో ప్రవేశపెట్టి చట్టంగా తీసుకురానున్నారు.

ఈ చట్టం అమల్లోకి వస్తే, బీసీలపై జరిగే ఎట్రాసిటీ కేసుల విచారణ కోసం ప్రతి జిల్లాలో ప్రత్యేక కోర్టులు ఏర్పాటు చేయనున్నారు. అవసరమైతే సెషన్స్ కోర్టులనే ప్రత్యేక న్యాయస్థానాలుగా నియమించనున్నారు. చార్జిషీట్ దాఖలు చేసిన తేదీ నుంచి రెండు నెలల్లో కేసు పరిష్కారం లక్ష్యంగా పెట్టుకున్నారు.

ప్రత్యేక కోర్టుల తీర్పుపై అసంతృప్తి ఉంటే, 90 రోజుల్లో హైకోర్టును ఆశ్రయించే అవకాశం కల్పించనున్నారు. అవసరమైతే ఈ గడువును గరిష్ఠంగా 180 రోజుల వరకు పొడిగించవచ్చు. ఈ కేసుల విచారణకు కనీసం ఏడేళ్ల అనుభవం ఉన్న న్యాయవాదులను నియమించనున్నారు.

బీసీలపై జరిగిన నేరాలకు సంబంధించి ఫిర్యాదులు స్వీకరించడంలో, ఎఫ్‌ఐఆర్ నమోదు చేయడంలో లేదా 60 రోజుల్లో చార్జిషీట్ దాఖలు చేయడంలో ప్రభుత్వ ఉద్యోగులు ఉద్దేశపూర్వకంగా నిర్లక్ష్యం చేస్తే, వారికి కనీసం 6 నెలల నుంచి గరిష్ఠంగా ఒక సంవత్సరం వరకు జైలు శిక్షతో పాటు జరిమానా విధించేలా ముసాయిదా చట్టంలో పేర్కొన్నారు.

ఈ చట్టం ద్వారా బాధితులు, సాక్షులకు ప్రభుత్వ రక్షణ కల్పించనున్నారు. వారికి భద్రతతో పాటు కేసు విచారణ సమయంలో అయ్యే ప్రయాణ, భోజన ఖర్చులను ప్రభుత్వమే భరిస్తుంది. బాధితుల పునరావాసానికి అవసరమైన సామాజిక, ఆర్థిక సహాయాన్ని కూడా అందించనున్నారు. ప్రభుత్వం అందిస్తున్న సహాయంపై కోర్టు ఎప్పటికప్పుడు సమీక్ష చేయనుంది.