ద్రాక్షారామ భీమేశ్వర స్వామి ఆలయంలో శివలింగం ధ్వంసం ఘటన – నిందితుడి అరెస్ట్

ద్రాక్షారామ భీమేశ్వర స్వామి ఆలయంలో శివలింగం ధ్వంసం ఘటన – నిందితుడి అరెస్ట్

ద్రాక్షారామం (కోనసీమ జిల్లా):

ప్రఖ్యాత పంచారామ క్షేత్రాల్లో ఒకటైన ద్రాక్షారామ భీమేశ్వర స్వామి ఆలయంలో శివలింగం ధ్వంసం చేసిన ఘటనలో పోలీసులు నిందితుడిని అరెస్ట్ చేశారు. ఈ కేసులో శీలం శ్రీనివాస్ను అదుపులోకి తీసుకున్నట్లు పోలీసులు అధికారికంగా వెల్లడించారు.

పోలీసుల వివరాల ప్రకారం, పంట కాలువ స్థలం విషయంలో ఆలయ ఉద్యోగులతో నిందితుడికి గతంలో వివాదం జరిగింది. ఈ నేపథ్యంలో ఆలయ ఉద్యోగులు, పూజారిపై కక్ష పెంచుకున్న శీలం శ్రీనివాస్‌, పూజారిపై తప్పుడు కేసు మోపే ఉద్దేశంతో ముందస్తు ప్రణాళికతో ఈ దాడికి పాల్పడ్డాడని విచారణలో తేలింది. ఆలయ పవిత్రతను భంగం కలిగించేలా శివలింగాన్ని ధ్వంసం చేసినట్లు పోలీసులు తెలిపారు.

ఈ ఘటనపై జిల్లా ఎస్పీ రాహుల్ మీనా తీవ్రంగా స్పందించారు. ఆలయాలు, ప్రార్థనా స్థలాలపై దాడులు సహించబోమని స్పష్టం చేశారు. నిందితుడిపై చట్టప్రకారం కఠిన చర్యలు తీసుకుంటామని, ఇటువంటి ఘటనలు పునరావృతం కాకుండా భద్రతా చర్యలు మరింత కఠినతరం చేస్తామని ఎస్పీ పేర్కొన్నారు.

ఈ ఘటనతో భక్తుల్లో ఆందోళన నెలకొనగా, పోలీసులు ఆలయ పరిసరాల్లో భద్రతను పెంచారు. కేసు విచారణ కొనసాగుతోందని, అవసరమైతే మరిన్ని వివరాలు వెల్లడిస్తామని అధికారులు తెలిపారు.