మూడవ శాసనసభ ఏడవ సమావేశాలు ప్రారంభం

మూడవ శాసనసభ ఏడవ సమావేశాలు ప్రారంభం

హైదరాబాద్: రాష్ట్ర మూడవ శాసనసభ ఏడవ సమావేశాలు సోమవారం ప్రారంభమయ్యాయి. ఈ సందర్భంగా శాసనసభ ప్రాంగణానికి చేరుకున్న ముఖ్యమంత్రి ఎ. రేవంత్ రెడ్డి గారికి మంత్రులు, ప్రభుత్వ విప్‌లు, ప్రభుత్వ ప్రధాన కార్యదర్శి, శాసనమండలి మరియు శాసనసభల కార్యదర్శులు ఘనంగా స్వాగతం పలికారు.

సభ ప్రారంభం అనంతరం ముఖ్యమంత్రి గారు ప్రతిపక్ష నాయకుడి స్థానం వద్దకు వెళ్లి కల్వకుంట్ల చంద్రశేఖర రావు గారిని మర్యాదపూర్వకంగా పలకరించారు. ఈ దృశ్యం సభలో సౌహార్ద వాతావరణానికి నిదర్శనంగా నిలిచింది.

శాసనసభ తొలి రోజున దివంగత సభ్యులకు సంతాపం ప్రకటించింది. సూర్యాపేట మాజీ శాసనసభ్యుడు రాంరెడ్డి దామోదర్ రెడ్డి గారు, చేవెళ్ల మాజీ శాసనసభ్యుడు కొండా లక్ష్మారెడ్డి గార్ల మృతికి సభ సంతాప తీర్మానం చేసింది. సభ్యులంతా కొద్దిసేపు మౌనం పాటించి వారికి నివాళులర్పించారు.

అనంతరం సభాపతి గడ్డం ప్రసాద్ కుమార్ గారు జీరో అవర్‌ను చేపట్టారు. సభ్యులు పలు ప్రజా సమస్యలను సభ దృష్టికి తీసుకువచ్చారు. జీరో అవర్ అనంతరం శాసనసభను జనవరి 2వ తేదీకి వాయిదా వేస్తున్నట్లు సభాపతి ప్రకటించారు.

మూడవ శాసనసభ ఏడవ సమావేశాల్లో ప్రభుత్వం కీలక బిల్లులు, ప్రజా సంక్షేమ అంశాలపై చర్చలు జరపనుండగా, ప్రతిపక్షాలు కూడా ప్రధాన సమస్యలను లేవనెత్తే అవకాశం ఉందని రాజకీయ వర్గాలు విశ్లేషిస్తున్నాయి.