తెల్లాపూర్ అమరుడు సాయి ఈశ్వర చారికి బీసీ ఐక్యవేదిక తరఫున ఘన నివాళులు

తెల్లాపూర్ అమరుడు సాయి ఈశ్వర చారికి బీసీ ఐక్యవేదిక తరఫున ఘన నివాళులు

పఠాన్‌చేరు, డిసెంబర్ 08 :

తెల్లాపూర్ బీసీ సంఘం ఆధ్వర్యంలో, మాజీ ఉప సర్పంచ్ ఎన్. కృష్ణ అధ్యక్షతన గద్దర్ సర్కిల్ వద్ద అమరుడు సాయి ఈశ్వర చారికి ఘన నివాళులు అర్పించారు. కార్యక్రమంలో పాల్గొన్న బీసీ ఐక్యవేదిక తెలంగాణ రాష్ట్ర అధ్యక్షులు భేరి రామచందర్ యాదవ్ మాట్లాడుతూ, అమరుడి కుటుంబాన్ని ప్రభుత్వం అన్ని విధాలుగా ఆదుకోవాలని విజ్ఞప్తి చేశారు.

సాయి ఈశ్వర చారి కుటుంబంలోని పిల్లల విద్య ఖర్చులు ప్రభుత్వం భరించాలని, కుటుంబంలోని ఒకరికి తక్షణమే ఉద్యోగం కల్పించేలా చర్యలు తీసుకోవాలి అని రామచందర్ యాదవ్ డిమాండ్ చేశారు. బీసీ రిజర్వేషన్ల విషయంలో గత ప్రభుత్వాలు, ప్రస్తుత ప్రభుత్వాలు బీసీలను వరుసగా మోసం చేశాయని ఆయన విమర్శించారు.

మాజీ ఉప సర్పంచ్ ఎన్. కృష్ణ మాట్లాడుతూ, రాబోయే స్థానిక సంస్థల ఎన్నికల్లో బీసీలు ఐక్యంగా నిలిచి తమ ఓటుతో శక్తిని చాటాలని పిలుపునిచ్చారు. వడ్డే నరసింహులు మాట్లాడుతూ, బీసీ యువత నిరాశకు గురికాకుండా హక్కుల కోసం ధైర్యంగా పోరాడాలని సూచించారు.

ఈ కార్యక్రమంలో సాయన్న, మాజీ సర్పంచ్ పి. కుమార్ గౌడ్, వడ్డే నరసింహులు, మాజీ కౌన్సిలర్లు భరత్, శ్రీశైలం, చిలకమర్రి ప్రభాకర్ రెడ్డి, ఎల్. రవీందర్, ఐలేష్ యాదవ్, కంజర్ల కృష్ణమూర్తి చారి, రాగం రమేష్ యాదవ్, జర్నలిస్ట్ కృష్ణ, వంగూరు శ్రీనివాస్ యాదవ్, నర్సింగ్ ముదిరాజ్, విజయలక్ష్మి, హరికృష్ణ చారి, అందేలా కుమార్ యాదవ్, శివా యాదవ్, గణేష్ యాదవ్ తదితరులు పాల్గొన్నారు.

పెద్ద సంఖ్యలో హాజరైన ప్రజలు అమరుడు సాయి ఈశ్వర చారికి పూలమాలలు అర్పించి నివాళులర్పించారు.