బీసీలకు 42 శాతం రిజర్వేషన్లపై..ఆవేదనతో యువకుడు ఆత్మహత్యాయత్నం!

బీసీలకు 42 శాతం రిజర్వేషన్లపై..ఆవేదనతో యువకుడు ఆత్మహత్యాయత్నం!

తీన్మార్ మల్లన్న కార్యాలయం ఎదుట ఓ యువకుడు ఆత్మహత్య యత్నం

బీసీలకు 42 శాతం రిజర్వేషన్లపై అన్ని రాజకీయ పార్టీలు విఫలమయ్యాయని ఆవేదన

గాంధీ ఆసుపత్రికి తరలించిన మేడిపల్లి పోలీసులు, పరిస్థితి విషమం

మేడిపల్లి, నేడు ప్రతినిధి: బీసీ రిజర్వేషన్లపై ఆవేదనతో ఓ యువకుడు ఆత్మహత్యాయత్నానికి పాల్పడ్డాడు. స్థానిక సంస్థల ఎన్నికలలో బీసీలకు 42 శాతం రిజర్వేషన్లు అమలు చేయడంలో అన్ని రాజకీయ పార్టీలు విఫలమయ్యాయని ఆ యువకుడు ఆవేదన చెందాడు. సాయి ఈశ్వర్(35) అనే వ్యక్తి ఒంటిపై పెట్రోల్ పోసుకుని ఆత్మహత్య యత్నానికి పూనుకున్నాడు. పీర్జాదిగూడ నగర పరిధిలోని ఎమ్మెల్సీ తీన్మార్ మల్లన్న కార్యాలయం ముందు జరిగిన ఈ సంఘటన స్థానికంగా కలకలం రేపింది. స్థానికులు తెలిపిన వివరాల ప్రకారం.. సంగారెడ్డి జిల్లా పోచారం గ్రామానికి చెందిన సాయి ఈశ్వర్ డ్రైవర్

గా పని చేస్తూ బ్రతుకుతెరువు కోసం తన భార్య కవిత ముగ్గురు పిల్లలతో కలిసి నగరంలోని జగద్గిరిగుట్ట మద్దూర్ నగర్ లో నివాసం ఉంటున్నాడు. గురువారం సాయంత్రం పీర్జాదిగూడలోని ఎమ్మెల్సీ తీన్మార్ మల్లన్న కార్యాలయానికి వచ్చాడు. మల్లన్నను కలవాలని సిబ్బందికి తెలియజేశాడు. ప్రస్తుతం మల్లన్న అందుబాటులో లేడని, రేపు ఉదయం రావాలని అక్కడి సిబ్బంది చెప్పి పంపించారు. దీంతో

కిందకు వచ్చిన సదరు యువకుడు క్యూ న్యూస్ కార్యాలయం ఎదుట పెట్రోల్ పోసుకుని నిప్పుంటించుకున్నాడు. వెంటనే స్థానికులు మంటలు అర్పేందుకు యత్నించడంతో పాటు ఫైర్ ఇంజన్, స్థానిక పోలీసులకు సమాచారం ఇచ్చారు. తక్షణమే తీవ్రంగా గాయపడిన యువకుడు సాయి ఈశ్వర్ ను మేడిపల్లి పోలీసులు గాంధీ ఆస్పత్రికి తరలించారు. ఆత్మహత్యకు పాల్పడ్డ సాయి ఈశ్వర్ పరిస్థితి విషమంగా ఉందని ఆసుపత్రి వైద్యులు తెలిపారు. కాగా, విషయం తెలుసుకున్న ఎమ్మెల్సీ తీన్మార్ మల్లన్న యువకుడు సాయి ఈశ్వర్ ను పరామర్శించేందుకు గాంధీ ఆస్పత్రికి వెళ్ళి, ఆత్మహత్య యత్నానికి గల కారణాలు అడిగి తెలుసుకున్నారు.

ఎవరు ఇలాంటి చర్యలకు పాల్పడవద్దు: నారగోని

బీసీలకు చట్టసభలలో స్థానిక సంస్థలలో ఉద్యోగాలలో తీవ్ర అన్యాయం జరుగుతుందని బీసీ నాయకుడు నాగగొని ప్రవీణ్ అన్నారు. ఈ పరిస్థితిలోనే అసంతృప్తితో సాయి ఈశ్వర్ అనే యువకుడు ఒంటిమీద పెట్రోల్ పోసుకొని కాల్చుకోవటం జరిగిందని తెలిపారు. గాంధీ హాస్పిటల్ లో చికిత్స పొందుతున్నాడని, ఇది చాలా దురదృష్టకరమైన సంఘటన అన్నారు. యువకులు ఇలాంటి సంఘటనలకు పాల్పడవద్దని ఆయన పిలుపునిచ్చారు.